အအိပ်များသူ ပျက်စီးတတ်၏ (ပရာဘ၀သုတ်)
အအိပ်များသောသူသည် ကြီးပွားရေး ဆုတ်ယတ်ပျက်စီးတတ်၏။
မသူတောမှု ဒုစရိုက်မှုတို့ကို လိုလားသောသူသည် မသူတော်တရားတို့ကို လိုက်စား၍ လောကသံသရာ ကြီးပွားရေး ချမ်းသာရေးတို့၌ လေးစားတော့မည်မဟုတ်၊ မောဟ ဖိစီး ထိနမိဒ္ဓ အကုသိုလ်ဘက်သားတို့ လွှမ်းမိုးအားကြီး၍ ထိုင်းမှိုင်းလေးလံကာ အအိပ်အနေ များရာသည်ဖြစ်၍ နိဒ္ဒါသီလီ ကို ဆက်လက်၍ ပျက်စီးကြောင်းတရားအနေဖြင့် ဟောကြားတော်မူသည်ဟု မှတ်ယူသင့်သည်။
တနည်းသော်- မသူတော်တရားကို နှစ်သက်ခြင်းသည်သာ ပျက်စီးသည် မဟုတ်သေး။ အအိပ်များသော သူသည်လည်း ပျက်စီးတတ်သေးသည်ဟု ဟောတော်မူလို၍ နိဒ္ဒါသီလီ ကို ဆက်ကာ ပြတော်မူသည်ဟု မှတ်ယူရမည်။ များစွာသော လူ့ဒုစရိုက်သမားတို့သည် မကောင်းမှု၌ အပျော်အပါးများကြ၍ အမေ့အလျော့ အအိပ်အနေများကြ၏၊ နေမြင့်အောင် အိပ်တတ်ကြ၏။ အအိပ်များခြင်း၊ အအိပ်ကြီးခြင်း၏ အပြစ်ဒေါသတို့သည် များလှ၏။ အအိပ်များသော သူတို့၏ ကြီးပွားခြင်းကို မည်သူမျှတွေ့မြင်ကြရမည်မဟုတ်ပေ။ နေထွက်အောင် နေမြင့်အောင် အိပ်တတ်သောသူသည်-
၁။ နံနက်စောစော၌ ပြုအပ်သော အမှုကိစ္စတို့ကြောင့် ရရှိမည့် အကျိုးကျေးဇူးမှန်သမျှတို့မှ ဆုတ်ယုတ်၏။
၂။ နံနက်၌ အိပ်ရာမှ စောစောထတတ်သော သူတို့၌ ရရှိတတ်သော စီးပွားရေး၊ ကျန်းမာရေး၊ ပညာရေး၊ ကောင်းမှု ကုသိုလ်ရေးတို့မှ ယုတ်လျော့ဆုံးရှုံး၏။
၃။ နံနက်ခင်း၌ သန့်ရှင်းအေးမြသော လေကောင်း လေသန့်ကို မရှူမရှိုက်ရ၊ လေကောင်းလေသန့် အရသာကို မခံစားရခြင်းကြောင့် ကိုယ်တွင်း၌ သန့်ရှင်းမှု နည်း၍ မစွဲကပ်သင့်သော ရောဂါဆိုးများ စွဲကပ်တတ်၏။
၎။ အိမ်တွင်း၊ အခန်းတွင်း ခြင်ထောင်တွင်း၌ မသန့်ရှင်းသော လေဟောင်း လေသိုးတို့ကို ရှူရှိုက်နေရခြင်းကြောင့်လည်း ကိုယ်တွင်းသို့ ရောဂါပိုးများ ၀င်ရောက်၍ မစွဲကပ်သေးသော ရောဂါများ စွဲကပ်တတ်၏။
၅။ စွဲကပ်ပြီး ရောဂါများ ကြီးပွားအားရှိ၍ ကျန်းမာရေး ချို့ငဲ့တတ်၏။
၆။ ရုပ်ခန္ဓာ သန့်ရှင်းမှုနည်း၍ ကျန်းမာရေးချို့ငဲ့တတ်သော သူတို့၌ များသောအားဖြင့် ထိုရုပ်ကို အမှီပြု၍ ဖြစ်ပေါ်သော စိတ်နာမ် ပညာနာမ်တို့သည်လည်း သွက်လက်ထက်မြက်ခြင်းမရှိ။ ထုံထိုင်းလေးတွဲ့ ချိနဲ့တတ်၏။
၇။ စိတ်ဓါတ်၊ ဥာဏ်ဓါတ်၊ ထုံထိုင်းချည့်နဲ့သောသူသည် သူတစ်ပါးနှင့် တန်းတူအောင် ကြီးပွားချမ်းသာရေးတို့ကို ကြံစည်ဆောင်ရွက်မှုကို မပြုနိုင်တော့ဘဲ ယုတ်လျော့ပျက်စီးလေတော့သည်။
အိပ်ခြင်းကို မည်မျှအပြစ်ဆိုကြသည်ကို ကြည့်ဦးလော့။ အခါတစ်ပါး၌ ရာဇဂြိဟ်မြို့ ဝေဠုဝန်ကျောင်းတော်ဝယ် မြတ်စွာဘုရား သီတင်းသုံးနေတော်မူစဉ် ညဥ့်သုံးယာမ်တွင် နောက်ဆုံးဖြစ်သော ပစ္ဆိမယာမ်ကို သုံးစုပြု၍ နောက်ဆုံးအစု၌ အရုဏ်မတက်မီအတွင်း ဂန္ဓကုဋိကျောင်းတော်သို့ ၀င်တော်မူ၍ လက်ျာဘက်သို့ စောင်းတော်မူလျက် အပန်းဖြေကာ အခိုက်အတန့် လျောင်းလဲကျိန်းစက်တော်မူခိုက်၌ မာရ်နတ်က လာ၍-
၁။ အိပ်တယ်ဆိုတာ သည်လိုလား။
၂။ ဘာ့ကြောင့် အိပ်ပါသလဲ။
၃။ လူသေကဲ့သို့ အဘယ့်ကြောင့် အိပ်ပါသလဲ။
၎။ လူဆိတ်သောကျောင်းကို ရပြီဟူသော သဘောနှင့် အိပ်ပါသလား။
၅။ နေထွက်အောင် အဘယ့်ကြောင့် အိပ်ပါသလဲ။ ဟု အပြစ်ကင်းစင်သော ဗုဒ္ဓမြတ်စွာကိုပင် တမင်အပြစ်ရှာ၍ အပြစ်တင်လေသည်။
ဤမျှတိုတောင်းသော အချိန်ကာလကလေး၌ ဣရိယာပုတ်မျှစေ၍ အပန်းဖြေကာ ကျိန်းစက်တော်မူသော မြတ်စွာဘုရားကိုပင် "ဘုရားဆိုတာ သည်လို အိပ်ရသလား" ဟူ၍ အပြစ်ရှာသေးရာ တကယ်အာရုံတက်အောင် နေထွက်အောင် အိပ်ကြသော ရဟန်းရှင်လူတို့ကို မာရ်နတ်က အဘယ်ပုံ ကဲ့ရဲ့လိမ့်မည်ကို စဉ်းစားကြပါလေ။
အအိပ်အနေ များခြင်း၏ အပြစ်၊ အရုဏ်တက်အောင် နေထွက်အောင် အိပ်တတ်ခြင်း၏ အပြစ်တို့ကို အတန်အရာ သိကြရပြီ။ အအိပ်အနေ နည်းပါးခြင်း၊ နံနက်စောစော အိပ်ရာမှ ထလေ့ရှိခြင်း၏ အကျိုးကျေးဇူးကိုလည်း အသင်တို့ သိသင့်ကြပေသည်။
0 Response to "အအိပ်များသူ ပျက်စီးတတ်၏ (ပရာဘ၀သုတ်)"
Post a Comment